Хоһуйуу
Анна ВИНОКУРОВА – Үрүҥ КӨТӨР
Анна Егоровна Винокурова — Үрүҥ Көтөр 1967 сыллаахха атырдьах ыйын 6 күнүгэр Орто Халыма улууһун Өлөөкө-Күөл бөһүөлэгэр күн сирин көрбүтэ. Үйэтин тухары төрөөбүт түөлбэтигэр уруһууй учууталынан үлэлээбитэ. Икки хоһоон кинигэтин автора. Кэлэн иһэр Тапталлаахтар – Сибэтиэй Балантыын уонна Аҕа дойдуну көмүскээччилэр күннэригэр анаан таптал уонна эр дьон тустарынан хоһооннорун анаата.
Уһун суол айанын суоппарыгар
Уһун суол айанын суоппарын,
Ыраах суол сулуһа ыҥырар.
Эр бэрдин сүүс төгүл эрийэн,
Массыына мотуора утуппат.
Тыал тэҥҥэ сырсыһан мэниктиир,
Түргэнник айанныыр кэмигэр.
Көҥүлтэн, чуумпуттан кэрэттэн,
Ыллыахха, көтүөххэ диэбиттии.
Эрэллээх илиигэр уруулуҥ,
Дабайар хайаҕар тириэртин.
Массыынаҥ – эн көлөҥ, доҕоруҥ,
Таҥараҥ харысхал буолуохтун.
Уһун суол айаныҥ сырыыта,
Ырыалаах, аргыстаах, алгыстаах.
Тахсар кун сып-сырдык сарыала,
Эн курдук – бараммат үтүөлээх.
26.10.24
***
Көмүс күн мырааҥҥа саспыта,
Былыты барытын кытардан.
Эн миигин долгута көрбүтүҥ,
Сүрэхпин уулларар мичээрдээх.
Тыал миигин уоскутар, уоскутар,
Итийбит иэдэспин таарыйан.
Иһийбит киэһэбит нуурайар,
Мин тэбэр сүрэҕим тыаһыгар.
Илиибэр эн илииҥ сылааһа,
Бу нарын иэйиибэр налыйар,
Наҕыллык хараҥа халыйар,
Таптаары, кууһаары, уураары.
27 08.24
***
Куус миигин, соҕотох түүннэртэн,
Сайыһан, хам тоҥмут түүлбүттэн.
Соһуйа иһиллиир чуумпуттан.
Эйиэхэ талаһар муҥмуттан.
Сонньуйа налыйбыт көхсүбүн,
Күлүктээх санаалар туппуттар.
Күлүм уот чаҕылхай харахпын,
Курус сыл кэхтиитэ бүрүйбүт.
Бараммат, кый ыраах кыраайтан,
Аалай күн саҕаҕа буолаҥҥын,
Куус миигин ,ахтылҕан куйаартан,
Кынаттаан – көтүтэр дьолгунан.
28.08.24
***
Эн аттыгар утуйабын – уоскуйан,
Уохтаах ахтылҕаммын ханнаран.
Уот кутааҕар сылаанньыйан.
Уураһан -ууллан,куустуһан .
Кууһабын илиим сылааһынан,
Сибэкки нарын иэйиитинэн,
Имэрийэр ытыһыҥ суоһугар,
Суурайар долгун имэҥигэр.
Хараҥа хараҕым халлааныгар.
Халыйа өтөр итии сүүрээнигэр.
Ыга ылан иһэр,өрүс уутугар,
Тимирэбин -илииҥ иһигэр,
Сүрэх тэбиитин күүһүгэр,
Дьиримнии-дьиримнии ууллан.
Тырымныы – тырымныы тыллан,
Таптыыртан эрэ дьоллонон.
Таптыыбын дииргэр эрэнэн.
29.09.24
***
Саха быһаҕын курдук сытыы,
Тимир кылбачыйар биитинии
Эр киһи сүрэҕин чуумпута,
Таптыыбын диэн эппэт сэмэйэ.
Харыстыыр хараҥа хараҕар,
Хаххалыыр саннытын күүһүгэр.
Улахан ытыһын иһинэн
Сэрэнэн кууһуоҕа доҕорун.
Эр киһи сүрэҕин тэбэрин,
Истиэҕиҥ ол онно этэрин.
Сир-халлаан ньиргийэр этиҥин.
Умайар уот кутаа тапталын.
