Олоҥхо Ыһыаҕын Кэбээйи бар дьоно сомоҕолоһон арыйда
XIX Өрөспүүбүлүкэтээҕи Олоҥхо Ыһыаҕа бу дьыл от ыйын 3–5 күннэригэр Кэбээйи улууһун Кэбээйи нэһилиэгэр Уһун Хонуу ытык сиригэр буолан ааста. Бу тэрээһин Арассыйа норуоттарын сомоҕолоһууларын сылыгар, Саха сиригэр култуура сылыгар анаммыта уонна Олоҥхо Үһүс уон сылын саҕаланыытын бэлиэтээтэ. Быйылгы Олоҥхо Ыһыаҕын Кэбээйи улууһун дьоно-сэргэтэ сомоҕолоһон, күүһүн-уоҕун түмэн арыйда уонна иилээн-саҕалаан ыытта.
Өрөгөйдөөх ыһыах үгэс буолбут сиэртэн-туомтан саҕаланна. Алгысчыт Михаил Винокуров Үрдүк Айыылартан сүһүөхтээх бэйэтэ сүгүрүйэн туран этэҥҥэ олоҕу көрдөстө. 92 саастаах ытык аксакаал Петр Семенов ыһыах саҕаланыытын алҕаата уонна үрүҥ илгэни ыһыахтаан сиэри-туому оҥордо. СӨ Ил Дархана Айсен Николаев киин түһүлгэҕэ үөрүүлээхтик Ытык Дуоҕаны туруорда. Үс күннээх тэрээһин устата 40-тан тахса күрэс, күрэхтэһии буолла.
Олоҥхо Ыһыаҕын устуоруйатыр аан маҥнай ЮНЕСКО «Аан дойду норуоттарын эпостара» диэн норуоттар икки ардыларынааҕы бырайыак уонна «Саха сирин улуустарын амтана» диэн гастрономическай түһүлгэ арыллан үлэлээтилэр.
Ытык Дуоҕа Ленскэй оройуон баһылыгар уонна олохтоохторугар туттарылынна. Эһиилги Олоҥхо Ыһыаҕа Лиэнскэй куоракка Өлүөнэ эбэ кытылыгар буолар.
Ираида ПОПОВА
Виктор ЭВЕРСТОВ хаартыскаҕа түһэриитэ
